Претседателот на Левица, Димитар Апасиев, денеска на прес-конференција објави дека кандидат на партијата за градоначалник на Скопје ќе биде Амар Мециновиќ, актуелен пратеник и поранешен советник во Градот.

Апасиев најави рекордно учество на Левица на претстојните локални избори.

„На минатите избори имавме осум кандидати, оваа година ќе одиме со преку 20. Имавме 38 советнички листи, а сега ќе бидат над 62. Ова покажува дека Левица прераснува од мала во средно-голема политичка партија“, рече тој.

Мециновиќ, кој досега беше и портпарол на Левица, посочи дека неговите приоритети како иден градоначалник ќе бидат јавниот транспорт, чистотата во градот, усвојувањето на нов Генерален урбанистички план и борбата против загадувањето.

„Јавниот превоз ќе ни биде примарен приоритет. Левица сака да ги обедини сите кои се против ВМРО-ДПМНЕ и СДСМ. На нивна страна се парите и моќта, но за она што ние го нудиме тие немаат одговор. Ова е наша борба и наша приказна, за нашето Скопје“, изјави Мециновиќ.