Александар Васовски зборува за кризата во најтрофејниот фудбалски клуб: Можно е Вардар да не учествува во првенството
Долго се знаеше дека клубот не плаќа, дека тоне во долгови и слично. Сите си молчеа, никој не реагира, а сега кога проблемот ескалира максимално, може да биде веќе и доцна, вели тренерот
Најтрофејниот македонски фудбалски клуб Вардар многу е веројатно да не учествува во Првата македонска лига што започнува на 9 август, вели неговиот тренер Александар Васоски.
Клубот не ги започнал подготовките, моментно е обременет со проблеми, огромни долгови, недефиниран сопственички статус, па иако е шампион на Македонија, неговиот опстанок како клуб е доведен во прашање.
Неодамна фудбалерите на Вардар упатија јавен апел за спас на клубот и ја искажаа својата огорченост од односот на сопственикот, управата и тоа како институциите во земјава го третираат колективот според кој се распознава македонскиот фудбал. Го прашавме тренерот Александар Васоски дали е можно шампионот да не учествува во Првата лига претстојната сезона?
– Не знам што да кажам. Многу е веројатно. Ако нема екипа, ако нема спонзор… Фудбалерите преку суд ќе си ги барата парите и со самата постапка, клубот… Не ги знам до детали правилата. Дали можеби со младинска екипа би можел да учествува. Можно е да не учествува во лигата. Ако пропадне како правно тело има шанса да се префрли во четврта лига. Тешко и дека ќе започнеме со подготвки. Нема решение на повидок – вели Васоски кој го коментира и неодамнешниот апел на фудбалерите на Вардар.
– По апелот се разбуди македонската спортска јавност. Многумина упатуваат апели до надлежните, односно до Град Скопје и до потенцијалните инвеститори. Но тука нашето завршува. Ако на македонската спортска јавност или на Македонија како држава не и е потребен Вардар, тогаш да не губиме време. Тоа е наш најголем фудбалски бренд и така да се пушти низ вода е убиствено за македонскиот фудбал – вели Васоски, кој го потенцира познатиот факт дека долгот што го има Вардар е најголемиот проблем.
Долгот боде очи
– Вардар има долг и кај секој потенцијален инвеститор тој долг од околу три милиони евра боде очи. Се надеваме дека ќе се најде заеднички јазик и дека целата приказна ќе продолжи. Можеби веќе е и малку доцна, доцниме со подготвките. Но се работи за поголемо нешто – за спас на клубот – вели Васоски според кого фудбалерите чекаат разврска пред да си ги бараат парите на суд.
– Засега не ни е во план правна акција. Чекаме разврска. Се надеваме дека се ќе се реши надвор од судовите. Меѓутоа тие се заработени пари на фудбалерите и не е исклучено и по судски пат да ги побараат, дали преку ФФМ или УЕФА или судот во Скопје. Но сите чекаме позитивна разврска. Клубот ни должи веројатно преку десетина плати – вели Васоски, кој не може да не ја истакне апсурдноста на ситуацијата.
Шампион во распаѓање
– Ние сме шампиони на Македонија, а се распаѓаме. Греота е што се дозволи Вардар да дојда на ова дереџе. Не зборувам само за сопственикот, туку и за институциите во оваа држава. Долго се знаеше дека клубот не плаќа, дека тоне во долгови и слично. Сите си молчеа, никој не реагира, а сега кога проблемот ескалира максимално, може да биде веќе и доцна – вели Александар кој ја истакнува тешката ситуација на фудбалерите.
– Сите можеме да земеме раскин на договорите. Но ситуацијата е комплицирана. Коронавирусот си го зеде данокот во фудбалот. Не е лесно да најдеш клуб. Сите клубови сакаат да заштедат. Сега треба да ги раскинуваат и да бараат нова средина. Сите сме во незавидна ситуација – смета тренерот кој не гледа брза разврска што се однесува до инвеститори.
– Се преговара, но нема ништо конкретно. Губиме златно време. Ако лигата почнува за помалку од дваесетина дена, каде се подготовките, кога ќе се собере екипата? Пред Вардар е многу тежок период. Ние сме тука за да го спасиме, но ако видиме дека оваа ситуација продолжува веќе и ние ќе кренеме раце – искрен е Васоски.
Проблемот „експлодира“ кога сопственикот Сергеј Самсоненко во мај објави дека си заминува од Вардар, а клубот сака да му го предаде на Град Скопје. Проблем беше долгот од над два милиони евра што се уште не е регулиран, а градот може да го преземе клубот само ако нема долгови. Инвеститори тешко се наоѓаат во таква ситуација и оттогаш Вардар е ни на небо ни на земја… Русинот го купи Вардар во 2014 година за 81.000 евра. Клубот тогаш немаше долгови.