Со години се шпекулираше дека би можел да биде новиот Џејмс Бонд, а сега британскиот актер Идрис Елба доби витешка титула од кралот.

Ѕвездата на сериите „Лутер“ (Luther) и „Жицата“ (The Wire) беше одликувана не за актерските улоги, туку за својата долгогодишна и активна кампања против насилството со ножеви и за поддршката на младите преку својата фондација.

Елба изјави дека признанието го прифаќа во име на младите со кои работи и порача дека општеството има заедничка одговорност да им понуди реална поддршка и алтернатива на насилството.

На новогодишната листа на почести се најдоа и легендите на уметничкото лизгање Џејн Торвил и Кристофер Дин, кои беа прогласени за дама и витез, како и селекторката на англиската женска фудбалска репрезентација Сарина Вигман, која доби почесна титула дама по новиот европски успех на тимот.

Годинешната листа, според официјалните податоци, се одликува со зголема застапеност на жени и добитници надвор од Лондон, а има и значително присуство на припадници на етничките малцинства.