Ачерби е ослободен од обвиненијата за расизам, одлучи Италијанскиот спортски суд
Фудбалерот на Интер, Франческо Ачерби денеска беше ослободен од обвиненијата за расизам и расна навреда кон дефанзивецот на Наполи, Хуан Жесус, соопшти денеска Италијанскиот спортски суд.
– Нема докази дека Ачерби го навредил Хуан Жезус на расна основа – се вели во соопштението на судот.
Ачерби беше обвинет дека упатил расистичка навреда кон Бразилецот на натпреварот меѓу Интер и Наполи на 17 март во Милано.
Откако се појавија информациите за наводните навреди, Спалети го отстрани 36-годишниот Ачерби од репрезентацијата за пријателските дуели со Еквадор и Венецуела.
Во текот на својата кариера, дефанзивецот Ачерби забележа 34 настапи за италијанската репрезентација и постигна еден гол.