Македонскиот шампион Пелистер ја продолжи соработката со искусниот репрезентативец Жарко Пешевски, кој и во наредната сезона ќе го носи дресот на битолскиот клуб.

Кружниот напаѓач и раководството на „зелено-белите“ постигнаа договор за нова епизода од нивната успешна приказна, со што Пешевски останува важен дел од тимот и во периодот што следува. Неговото присуство во составот се покажа како значајно во изминатите сезони, во кои Пелистер бележеше сериозни успеси и ја зацврсти својата позиција како водечки клуб на домашната сцена, но и редовен учесник во европските натпреварувања.

Искусниот ракометар пристигна во Битола во еден од најплодните периоди во историјата на клубот, период во кој беа освоени повеќе трофеи и беше направен исчекор и на меѓународен план.

Пред да се приклучи на Пелистер, Пешевски настапуваше за Металург, Мотор Запорожје и германски Штутгарт, каде што стекна богато искуство на интернационалната сцена.