Алијанса за Албанците денеска ги повика Министерството за внатрешни работи и Обвинителството да ги истражат наводите за закани врз раководството и вработените во Агенцијата за управување со одземен имот за што пред три дена на прес-конференција информираше директорот на Агенцијата Дритон Небиу.

– Деновиве криминалци потврдени со судски решенија им се заканувале на вработените и на директорот на Агенцијата за управување со одземен имот Дритон Небиу. Сакаме да ве известиме дека зад директорот Небиу стои целата Алијанса за Албанците, целото Претседателство и сите членови. Безрезервно го поддржуваме нашиот директор кој неодамна, како никој досега после 10 години успешно продава имот конфискуван од криминалци и корумпирани поединци. Секоја закана и секој обид за заплашување е неуспешен од самиот почеток. Директорот Дритон Небиу, Алијансата за Албанците и сите функционери избрани од Алијансата за Албанците нема да застанат. Напротив, секој проект против криминалот и корупцијата ќе го реализираме, секој одземен имот ќе се продава и парите ќе им се враќаат на граѓаните до последен денар – вели Арбен Зеќири, портпарол на АА.

Во средата, директорот на Агенцијата за управување со одземен имот Дритон Небиу на прес-конференција соопшти дека вработените во Агенцијата се мета на закани и вознемирувања поради обидите да продадат конфискуван имот што во моментот е на аукција, без притоа да прецизира за чиј имот се работи