Во Социјален центар „Дуња“ на 11 декември, со почеток во 20 часот, со заеднички сет ќе настапат Мартин Џорлев (гитара), Нинослав Спировски (саксофон, кларинет) и Мартин Георгиевски (електроника).

Гитаристот Мартин Џорлев е широко препознаен по својот значаен придонес кон локалната и регионалната сцена, особено преку успехот на инди-рок / пост-панк бендот „Луфтанза“.

Неговата кариера започна како дел од различни музички состави и проекти, како што се „Зулу 3.4“, „Луфтанза“, „Стој, После!“ и „Животни“, кои оставија белег на македонскиот креативен музички пејзаж.

Нинослав Спировски е македонски фри-џез кларинетист и саксофонист, дел од генерацијата што го поттикна новиот бран на импровизирана музика во земјава.

Како еден од најактивните учесници на сцената, застапува личен израз и оригиналност надвор од традиционалните џез-шеми. Најпознат е по работата со „Светлост“ и „Светлост + Одрон ритуал оркестра“, а учествува и во бројни други состави.

Мартин Георгиевски настапува како „Амплидин ефект“ (Amplidyne Effect) од 2009 година, а фокусиран е на електронска, амбиентална и експериментална музика, претежно во форма на импровизирани сесии.

Има издадено бројни изданија, а музиката ја изведува соло и со бендови како „Пост глобал трио“, „Meissa Ionis“, „Трима“ и „Светлост + Одрон ритуал оркестра“. Настапувал на фестивалот „Похода“ во Словачка, „PNEM Soundart Festival“ во Холандија, „De:sonanz“, Скопскиот џез-фестивал и многу други.

Влез на концертот е препорачана донација за артистите.