Потенцијалната улога на личните предмети на човекот во преносот на патогени, досега е слабо истражуван. Но, новата студија открива дека, пластичните ремчиња за зглоб на познатите паметни часовници, содржат високи нивоа на потенцијално штетни бактерии, пишува британски „Телеграф“.

Податоците покажуваат дека, бактериите ешерихија коли и стафилокока, биле пронајдени на 60 и 85 отсто од сите истражени ремчиња за часовници. Додека пак, околу секое трето ремче имало знаци на контаминација со псевдомонади.

Научниците од Универзитетот во Флорида, тестирале 20 паметни часовници на испитаници, кои биле од различни профили, како пожарникари, ветеринари, посетители на теретана и канцелариски работници.

Лабораториската анализа барала колку единици бактерии, кои формираат колонии, има во одредена област и откри дека ремчињата од ткаенина се највалкани, а потоа биле ремчињата од пластика, гума, кожа и метал.

Студијата покажала дека златните ремчиња, кои се познати по своите антимикробни својства, немале забележлива количина на бактерии.

Потреба од редовна дезинфекција

„Порозните и статичните површини имаат тенденција да привлекуваат и да бидат колонизирани од пазлични бактерии“, изјавил д-р Нвадиуто Есиобу, еден од авторите на студијата.

Трите бактерии кои се истражувани во оваа студија, вообичаено се наоѓаат на човечката кожа и најчесто се безопасни. Сепак, тие можат да станат опасни по здравјето, доколку на кожата има отворени рани, кои бактериите може да ги „нападнат“.

„Количеството и таксономијата на бактериите што ги најдовме на ремчињата покажуваат дека има потреба од редовна хигиена на овие површини“, додал д-р Есиобу.

Тимот на научници открил дека антибактерискиот спреј и етанолот се најефикасни во убивањето на повеќето бактерии, додека домашниот лек од јаболков оцет е помалку ефикасен.

Д-р Есиобу смета дека и другите потенцијални форми на пренос на бактерии и подложност на инфекции, како што се слушалките или мобилните телефони, треба да се проучуваат на сличен начин.