Македонскиот фотограф Боро Рудиќ jа освои првата награда во делот за издаваштво за неговата фотомонографија „Егзит“ (Exit) на овогодишниот фотоекспо-фестивал „Рандеву имаж“ во Стразбур, Франција. Фотографиите во книгата „Егзит“ се поделени во четири целини: Влез (во град), Пораки (на градот), Излез и Финиш. Преку нив авторот го искажува својот став кон животот во современите градови, кој води кон отуѓување и укажува на потребата да се излезе од нив, во потрага по нешто подобро, што треба сами или, пак можеби, сите заедно да го откриеме.

– Иако „Егзит“ е приказна за градот, пред сè, се однесува на животот и порачува дека не треба да се плашиме од промени, дека секогаш постои подобра алтернатива што треба само да ја побараме – вели Боро Рудиќ.

Фестивалот се одржал од 24 до 26 јануари во Конгресната палата во Стразбур, каде биле прикажани околу 800 фотографии и 44 фотокниги, кои влегле во финалната конкуренција. На фестивалот биле прикажани само делата што поминале низ ригорозната селекција на арт-директорот Вероник де Вигери.

(Текстот е објавен во „Културен печат“ број 17, во печатеното издание на „Слободен печат“ на 8-9 февруари 2020)