Во САД претресени куќите на Олег Дерипаска, милијардерот близок на Путин
Агенти на Федералното истражно биро (ФБИ) денеска извршија претрес во неколку куќи во сопственост на рускиот олигарх Олег Дерипаска во Вашингтон, јавија американските медиуми, повикувајќи се на портпаролот на безбедносната агенција.
Репортерот Том Винтер напиша на Твитер дека федерални агенти се наоѓаат пред куќата на Олег Дерипаска, а пристапот до објектот е блокиран.
Причината за нивното присуство не е позната. Портпаролот истакна дека агенцијата го спроведува законот, но не даде повеќе детали за акцијата.
Претставниците на ФБИ засега не соопштуваат која е причината за рацијата во домот на Дерипаска, кој е сопственик на моќната енергетска компанија Ен+ и гигантот во производство на алуминиум, Русал.
Милијардерот е под санкции од САД од 2018 година, кога американската влада им забрани на компаниите од САД да прават зделки со неговите фирми. Според американското министерство за финансии, Дерипаска уште тогаш бил под истрага за перење пари, но и поради тоа што „им се заканувал на животите на бизнис-ривали, нелегално прислушувал владин службеник, а учествувал и во изнуди и рекетирање“.