Во недела ќе работат специјализирани продавници во туристички места
Од први октомври недела е неработен ден, но според усвоените измени на Законот за трговија од страна на Владата исклучоци ќе бидат специјализирани продавници за колачи, апетисани, весници, цигари и слично во туристичките места, како и штандови при проекции во кино-сали, на спортски настани и спортски манифестации. Можно е во недела да работат и продавници за храна, пијалоци и цигари, доколку трговецот-поединец работи сам во својата продавница, а ова важи и за оние што работат на пазарите.
Овие информации денеска ги соопшти министерот за економија Крешник Бектеши, кој повтори дека недела нема да биде неработен ден за трговските центри, но тамошните продавници ќе може да работат само во една смена, со зголемена дневница за вработените и со издвоен процент од приходот кој ќе оди во Буџетот за изградба на градинки.
Министерката за труд и социјална политика Јагода Шахпаска рече дека неделата – неделен ден за одмор станува реалност, а за тоа е изменет и Законот за работни односи. Според измените дневницата што работниците ќе ја добиваат за недела во дејностите каде мора да се одржи е зголемена за најмалку 50 проценти.