Само неколку стотици гласови недостасуваат во Гостивар за да се исполни законскиот цензус и изборите за градоначалник и советници да бидат легитимни. Одзивот на гласачите според податоците од Државната изборна комисија е 31,31%, додека цензусот е поставен на една третина од запишаните избирачи (33,33%).

Сепак, во текот на денот, официјалните записници ќе пристигнат во ДИК, преку кои се очекува да бидат потврдени конечните резултати од избирачките места. Записникот може да го промени резултатот доколку податоците испратени преку СМС-порака не биле целосно точни. Доколку се постигне цензусот, тогаш кандидатот на АКИ, Валбон Лимани, ја добива трката во првиот круг со 61,39% од гласовите.

Цензусот официјално не е достигнат во општините Врапчиште, Маврово Ростуше и Центар Жупа, каде што изборите ќе треба да се распишат од почеток и целата изборна постапка да се повтори.