Неколку десетици градоначалници од сите континенти, поаѓајќи од борбата против климатските промени, се обврзаа дека ќе создадат услови за чист воздух и со тоа ќе влијаат на подобрување на здравјето на луѓето во градовите. Повеќе од 90 отсто од луѓето вдишуваат загаден воздух, што предизвикува болести и смрт, предупреди Светската здравствена организација (СЗО), пренесува Ројтерс.

Загадениот воздух годишно убива седум милиони луѓе, главно во градовите, рече генералниот секретар на ОН, Антонио Гутереш на Самитот Ц40 на светските градоначалници во Копенхаген.

Челниците на повеќе од 90 градови кои претставуваат преку 700 милиони ќуѓе и четвртина од светската економија, се сретнаа во данската престолнина оваа недела со цел да поттикнат акции против климатските промени.

Од Лос Анџелес до Токио, 35 градови се обврзаа дека ќе го исполнат минималното ниво на квалитет на воздухот според стандардите  на WHO до 2030 година, со што, како што наведоа, би можеле да се спасат 40.000 животи годишно.