Новите четири смртни случаи со кои бројот на починати е зголемен на девет предизвика паника во Карачи и загриженост дека ситуацијата е надвор од контролата на градските власти, кои не успеале да го идентификуваат изворот на истекувањето, ниту врстата на гасот. Сепак, официјалните лица ги одбиваат сомненијата за саботажа.

Стотина лица од неделата вечер се заболени, кога во населбата Камари на брегот првпат беше зафатена од гас без мирис кој предизвикува сериозни проблеми со дишењето, а луѓето одеднаш започнаа да се јавуваат во локалните болници.

Властите соопштија дека имале намера до вторник навечер да ги евакуираат жителите на Камари, населба која се наоѓа најблиску до главното пристаниште во Карачи.

Шефот на локалната полиција Адил Малик рече дека првично околу 150 лица се јавиле во болниците со исти симптоми, а иницијалната бројка од пет смртни случаи, набрзо се искачила на девет лица.

Од болницата е соопштено дека повеќе од 650 лица добиле помош досега, а сите заболени се жители на населбата Камари. Немало пријавени случаи на труење во самото пристаниште.

Официјалните лица во пристаништето во Карачи тврдат дека немало никакво истекување на гас од нивните постројки.

Карачи е најголемиот град во Пакистан и трговски центар на таа земја. Во близина има рафинерија на нафта, а исто така сместен е и главниот објект на пакистанската воена морнарица.