Високи германски и руски претставници ќе се обидат да ги намалат тензиите околу Украина
Високи германски и руски претставници ќе се сретнат следниот месец во обид да ги намалат тензиите околу Украина, јавија западни медиуми цитирајќи извор од германската влада.
Советникот на германскиот канцелар Олаф Шолц за надворешна политика, Јенс Плотнер и рускиот преговарач за Украина, Дмитриј Козак се договориле да се сретнат по телефонскиот разговор одржан во четвртокот, изјавија извори кои побарале да останат анонимни.
Берлин изрази повеќе сомнежи отколку Вашингтон дека Русија навистина планира да ја нападне Украина и сака да ги деескалира тензиите, изјавија два владини извора.
„Целта на германската страна останува да се постигне брзо реактивирање на Норманскиот формат “, изјави извор од германската влада.
Откако ја презеде функцијата овој месец, Шолц ја нагласи потребата од дијалог со Русија, но исто така им се придружи на западните сојузници во предупредувањето за можни санкции против Москва во случај на инвазија.