Единствениот пазар на труд е последната придобивка од Отворен Балкан, иницијатива за која има голема политичка волја и интерес на граѓаните од сите три земји. Од вчера државјаните на трите земји може да издадат Идентификациски број за Отворен Балкан. Националниот координатор за Отворен Балкан и за регионални иницијативи, Марјан Забрчанец, кој гостуваше во утринската програма на „Слободен печат“ вели дека единствениот пазар на труд е европска пракса во духот на слободното движење на луѓе и производи.
Постапката да се биде дел од единствениот пазар на труд е едноставна и за најмногу 30 дена, колку што трае периодот на безбедносните проверки државјанин од една од трите земји моѓе да работи во друга според националното законодавство што важи за домашните работници.

ВИДЕО| Забрчанец: За работниците од Отворен Балкан важат националните законодавства

Забрчанец рече дека преку иницијативата Отворен Балкан досега се спроведени десетина мерки – заедничко помагање меѓу трите држави во услови на несреќи и катастрофи, како што беше пред неколку лета кога имавме пожари и имавме интервентна помош со српски хеликоптери, потоа меѓусебно помагање со струја и храна во време на кризата, имаме зелени ленти на Ќафасан и Табановце за брз проток на транспортери со цел побрз увоз и извоз, функционира електронската патарина, со еден уред М- таг се поминува и низ Македонија и низ Србија, има многу бенифиции и во делот на туризмот со тоа што се промовираат заеднички тури како претставување на регионот, има одлична промоција на македонското вино во рамките на Отворен Балкан.

Забрчанец откри дека и Грција пројавила интерес бесконтактниот уред М-таг да функционира и кај нив, а во врска со критиките на транспортерите за протокот на стоки и услуги , тој вели дека до нив стигнале и пофалби, а критиките се добредојдени и ова е процес во кој постојано ќе има подобрувања.

– За да функционира Иницијативата Отворен Балкан има три услови: политичка волја, поддршка од граѓаните и спроведувањее на договореното од институции. Мислам дека македонската влада покажа дека има капацитет да ги спроведува мерките од Отворен Балкан – рече Забрчанец.

Тој најави дека наскоро ќе имаме суштински „уан стоп шоп“ и на Табановце и на Ќафасан.

– Таму има две куќарки кои се приближени, но не застанувате на двете различни граници. Кога влегувате во Србија застанувате само на српска страна и обратно. Постои јасен договор меѓу македонската и српската полиција и во моментов се работи на тоа. Мислам дека после изборите, секако ако и понатаму постои политичка волја и од двете страни, ќе дојде до суштински „Уан стоп шоп“ – вели Забрчанец.

Забрчанец вели дека она што е најважно е регионално да се поврзуваме. Притоа, напоменува дека Отворен Балкан е само една иницијатива, а ги има многу и од сите нив е важно да доаѓаат придобивки за народот.

Целото ВИДЕОИНТЕРВЈУ погледајте го во продолжение: