Откако ќе добие Идентификационен број за Отворен Балкан еден државјанин на Србија, Македонија, или Црна Гора може да ја продолжи процедурата во земјата во која ќе сака да работи. Постапката е брза, а единствена „пауза“ има додека се чека безбедносната проверка, затоа што сепак, странски државјанин дошол на работа, а таа процедура е најмногу 30 дена, објасни за „Слободен печат“, Марјан Забрчанец, национален координатор за Отворен Балкан и регионални иницијативи. Но, како што објасни тој, потоа самото вработување и работниот однос е како за домашни работници.

– Штом се склучи договор со работодавачот, од тука натаму продолжуваат да важат сите стандарди по однос на работнички права, пензиско, здравствено осигурување, согласно националното законодавство – вели Забрчанец.

Тој практично објасни како функционира идентификувањето во рамките на единствениот пазар на труд на трите земји.

– Ќе ја поминам постпаката низ пример со граѓанин од Врање, кој слушнал дека овде има потреба од работа во кумановска компанија која отвора 100 нови работни места и сака да аплицира за работа таму. Најпрвин, тој граѓани на Врање оди на српската Е-управа, тоа што е кај нас Е-услуги, вади Идентификациски број за Отворен Балкан за една минута, потоа со тоа бројче се логира во нашиот софтвер за е-услуги и аплицира за сертификат за слободен пристап на македонскиот пазар на труд. Тука има еден чекор што подразбира чекање малку – проверка од безбедносен аспект, македонското МВР го проверува тој апликант низ стандардна безбедносна постапка – вели Забрчанец.

Од вчера во трите држави од Отворен Балкан почна да функционира единствениот пазар на труд.