Ирина Лазарова од Скопје е филмски продуцент, која работи во индустријата за визуелни ефекти (VFX) во Скопје и носи со себе не само големо искуство, туку и феминистички дух. Таа за „Слободен печат“ објаснува како им е на жените во една индустрија во која главно доминираат мажите.

FX3X, најголемото студио за визуелни ефекти и анимација во Југоисточна Европа, е основано во 1997 година во Скопје, од страна на Кристијан Даниловски и Миливоје Ѓорѓевиќ. Студиото е познато по работата на големи холивудски продукции како „Еверест“, „Терминатор 4: Спасение“, „Спектра“, „Спајдермен“, „Далеку од дома“ и „Соник: Супер еж 3“, како и многу други познати филмови.

По многу филмски искуства како продуцентски координатор и извршен продуцент на македонски кратки и долгометражни филмови, Лазарова се приклучила во оваа компанија во 2018 година, каде што работи како продукциски координатор во индустријата за визуелни ефекти.

– Да си жена во индустријата за визуелни ефекти е интересно. Во светот 21,6% се жени, некаде 78% се мажи. Мажите се тие што многу порано почнале да се занимаваат со оваа професија и затоа најмногу ги држат супервизорските позиции – објаснува Лазарова.

Таа додава дека расте бројот на жени од Македонија кои се приклучуваат во оваа индустрија.

– Може да се пофалиме дека во последните 5 години има навистина поголем интерес и пораст на жени во индустријата за визуелни ефекти, како во продукција, односно, од тоа што јас го работам, така и во другите позиции, односно, артисти за композитинг, за CGI, за анимација – вели Лазарова.

Таа од нејзините осум години имала интерес за оваа индустрија и филмови. Се потсети кога нејзиниот татко ја однел на снимање на еден од најуспешните македонски филмови од времето, „Балкан-кан“.

– Тогаш знаев дека сакам да станам филмски продуцент – додава Лазарова.

Таа вели дека по влезот на FX3X во групата „Cinesite“ во 2022 година, имала можност да работи на некои од најпопуларните и најголеми продукции како што се серијата „Стар трек“ и Марвел филмовите.

– Во FX3X работиме на многу познати продукции. Нашите професионалци се присутни во индустријата повеќе од две децении и горди сме што сме дел од такви големи филмови – додава Лазарова.

Се чини дека иако работи во индустрија каде што доминираат мажи, успеала да го пронајде своето место и да ги надмине предизвиците со кои се соочуваат жените во оваа сфера. А тоа што најмногу ја радува е фактот дека нејзината мала ќеркичка се восхитува на нејзината работа.

– Ќерка ми почнува да сфаќа на што работам. И многу ми е интересно кога тоа ќе го сподели со нејзините другарчиња: „Мама работи на филмови и на цртани“ –  додава Лазарова.

Како крајна порака Ирина ги охрабрува сите жени што сакаат специфични професии.

– Среќна сум што живеам во време кога навистина можеш да бидеш тоа што сакаш. Кога ние како жени сме повеќе од кога било слободни да се изразуваме и да станеме тоа што сакаме да станеме – објаснува Лазарова.