„Слободен печат“, во соработка со Ред Бул Македонија, реализираше ексклузивно интервју со едно од најголемите имиња во светот на 3х3 кошарката – Душан Домовиќ Булут. Интервјуто го снимивме на спектакуларните кошаркарски терени во Дубаи, за време на светското финале на Red Bull Half Court.

Булут, познат и како Mr. Bulutproof, важи за еден од најдобрите и најкреативни 3х3 кошаркари на сите времиња.

Покрај светските ѕвезди и екипи на „Ред Бул Халф Корт“ турнирот, нашите кошаркари, браќата Амар и Елвис Хот, заедно со близнаците Паоло и Карло Блажевски, ја претставија Македонија на највисоко ниво и покажаа како се стигнува до финалето.

Со Душан поразговаравме за подготовките, адреналинот, неговите очекувања од тимовите и секако, научивме неколку трикови.

– Ова е едно од најдобрите 3х3 случувања во светот. Голема забава и одлична кошарка – вели Булут за „Слободен печат“.

Тој е многу горд на нашата екипа, која ја следеше уште од националното финале. А и ние гордо може да се пофалиме дека Душан ја предвиде нашата победа.

– Бев присутен на вашето национално финале и навистина имам големи очекувања. Тимот е многу талентиран и искусен за вакви услови. Секако, секогаш има силни противници, но верувам дека Македонија може да стигне многу високо – ни рече Душан.