Авганистанско момче на возраст од 13 години сам го егзекутираше човекот кој убил 13 членови на неговото семејство затоа што роднините ја одбиле можноста за помирување, а казната беше извршена на стадион со десетици илјади луѓе, објави Дејли мејл.

Врховниот суд на земјата пресуди дека сторителот, по име Мангал, е виновен за масакрот на 13 членови на семејството на тинејџерот, вклучувајќи деца и три жени. Тој беше осуден заедно со други за упад на дом во покраината Хост во јануари 2025 година и убивање на членовите на семејството.

Апелациониот суд и Врховниот суд ја потврдија смртната казна изречена од првостепениот суд, додека таа беше одобрена од врховниот лидер на Авганистан, Хезболах Ахунџада.

Талибанците воведоа строга интерпретација на шеријатскиот закон, што вклучува повторно воведување на јавни егзекуции извршени според спроведувањето на талибанците на ќисас, форма на одмазда, „око за око“.

Момчето го застрела убиецот на неговото семејство три пати пред 80.000 гледачи на стадион во градот Хост. Толпата скандираше „Алаху Акбар“ („Алах е голем“). Властите ја повикаа јавноста да ја гледа егзекуцијата во официјални соопштенија.

Роднините на момчето ја одбиле понудата на талибанците да го помилуваат осудениот криминалец.

Јавните егзекуции се честа појава

Откако се вратија на власт во 2021 година, талибанците извршија најмалку 12 јавни егзекуции.

Претходната се случи во октомври во Багдад, каде што еден маж беше погубен пред толпа и службени лица. Тој убил двојка (жената била бремена осми месец) и бил погубен од роднините на жртвите.

Во овој случај, три суда издадоа иста пресуда – смртна казна со егзекуција од страна на роднина – која беше ратификувана и од врховниот лидер на талибанците. Роднините дури и не сакаа да чујат за амнестија и мир.

Во април, четири мажи беа јавно погубени ист ден во три различни градови од страна на роднини на жртвите.

Иако ОН, преку својот специјален претставник, повикува на запирање на егзекуциите, жителите гледаат позитивно на нив бидејќи „никој нема да се осмели да убие никого во иднина“.

За „најлесните“ прекршоци, како што се кражба, прељуба и пиење алкохол, постои камшикување, кое исто така се извршува јавно. Во еден случај, најмалку 63 лица беа камшикувани, вклучувајќи 14 жени, кои беа обвинети за злосторства како што се содомија, кражба и „неморални“ врски.

Законот и редот се централни за тврдокорната идеологија на талибанците, забележува Дејли меил, кој потсетува дека во својот годишен извештај објавен во април, Амнести интернешнл го наведе Авганистан меѓу земјите каде што беа изречени смртни казни по судења кои „не ги исполнија меѓународните стандарди за фер судење“.

Сличностите помеѓу сегашната ситуација и драконските политики наметнати од талибанците кога владееја од 1996 до 2001 година се повеќе од очигледни, особено кога станува збор за суровите „закони на доблест и порок“.

И додека Западот официјално го третира Авганистан како земја каде што човековите права се задушуваат од ден на ден, неофицијалната „политика“ на влијателните лица е поинаква: тие патуваат во земја со природна убавина, недопрена од масовен туризам, како да нема варварски режим.

„Логиката“ на талибанците е сосема поинаква.

Во застрашувачка аудиопорака, врховниот лидер на талибанците рече дека „ќе ги камшикуваме жените, ќе ги каменуваме до смрт јавно за нивните злосторства. Можете да кажете дека нивните права се прекршени ако ги каменуваме јавно затоа што се прељубници затоа што тоа ги крши вашите демократски принципи. Но, јас го претставувам Алах, а вие ја претставувате Сатаната“.