Американскиот претседател Доналд Трамп изјави дека не е сигурен дали ќе влезе во рајот, но нагласи дека им го подобрил животот на многу луѓе. Коментарот доаѓа по значајниот дипломатски потег што резултираше со ослободување на последните заложници на Хамас.

Американскиот претседател Доналд Трамп изјави дека не е сигурен дека ќе може да влезе во рајот, но додаде дека „на многумина им го направил животот подобар“, објави американскиот портал Unilad. Изјавата ја даде во претседателскиот авион „Ер Форс Уан“ по потпишувањето на мировниот договор за Газа и ослободувањето на последните 20 заложници што ги држеше Хамас.

„Малку се шегувам. Мислам дека ништо нема да ме одведе во рајот. Можеби не сум предодреден за тоа. Можеби сум во рајот токму сега, додека летаме со Ер Форс Уан“, рече Трамп.

Тој повторно ја обвини администрацијата на Џо Бајден за неспособност и истакна дека војната во Украина никогаш немала да се случи доколку изборите во 2020 година не биле „наместени“.

Трамп вчера отпатува во Израел откако Хамас ги ослободи последните 20 заложници што ги држеше две години како дел од големиот мировен договор. Минатата недела, тој најави дека очекува ослободување на заробените.