Скопскиот Кривичен суд ги ослободи обвинетите Драган Павловиќ-Латас и јутјуберот Стефан Лазаров, водителот на поткастот во кој гостинот насмеан раскажуваше, а водителот воодушевен слушаше, за вистински случај на злоставување и силување девојка од младоста на Латас.

Како што објави „СДК.мк“, Судот ја сменил првичната пресуда со која Павловиќ-Латас и Лазаров беа осудени, но потоа се жалеа и скопска Апелација го врати предметот на повторно судење. ​На него судеше судијката која го води и предметот за пожарот во дискотеката „Пулс“ во Кочани, Диана Груевска-Илиевска, која ја донела ослободителната пресуда. Таа образложила дека делото за кое се обвинети Латас и Лазаров не е кривично дело.

Пресудата, како што забележуваат граѓаните на социјалните мрежи, доаѓа само два дена по ужасниот случај во скопската населба Тафталиџе, во кој мајка се фрли од зграда заедно со своето дете, откако со години постојано трпеле насилство од нивниот сопруг и татко, кое државните институции и служби, државата, не успеале да го казна и да го спречат.

Обвинителот Даниел Коцев најави дека ќе поднесе жалба до Апелација на ослободителната пресуда.

Откако поткастот беше пуштен, а јавноста жестоко реагираше, Секторот за компјутерски криминал на МВР веднаш достави известување до скопското Обвинителство, по што беше отворена истрага, а емисијата беше отстранета од Јутјуб.

Во обвинението пишуваше дека Лазаров и Латас извршиле кривично дело Ширење расистички и ксенофобичен материјал по пат на компјутерски систем од член 394-г, став 1, во врска со член 22 од Кривичниот законик. Тие „преку компјутерски систем ширеле расистичка и ксенофобична репрезентација на идеја која промовира насилство врз жени, со што предизвикале реакции и чувство на згрозеност и вознемиреност кај јавноста“, пишуваше во обвинителниот акт.

Убав момент да се потсетиме за што точно денеска кривичниот суд ги ослободи од обвинение Латас и Лазаров.

Два дена по убиството на мајка и дете од страна на семеен насилник. https://t.co/mSmqIZF4hw

— 42 (@forty_tw0) March 5, 2026

„Навистина ја претеравте“ – мајката на јутјуберот Лазаров ја искина партиската книшка од СДСМ