Претседателот на Владата на Република Северна Македонија, Димитар Ковачевски, заедно со лидерите на државите и владите на земјите членки во Процесот за соработка во Југоисточна Европа (ПСИЈЕ), вчера во Солун учествуваше на Самитот на шефови на држави и влади на земјите членки на Процесот за соработка во Југоисточна Европа.

По завршувањето на настанот била организирана вечера од страна на грчкиот премиер, Киријакос Мицотакис.

Како што може да се види на една од снимките кои ги објавија грчките медиуми, Мицотакис му го претставил Ковачевски на германскиот канцелар Олаф Шолц како премиер на Северна Македонија, а албанскиот премиер Еди Рама се пошегувал дека Ковачевски е премиер на државата која во иднина ќе биде Западна Бугарија.

Опозициската ВМРО-ДПМНЕ веднаш се огласи со своја реакција и побара оставка и извинување од премиерот Ковачевски за „понижувањето кое ѝ го приреди на Македонија“.

„Димитар Ковачевски не го штити, туку го продава македонскиот идентитет и Македонија. Едно збори пред камерите, а зад камерите гледаме како се смее и одобрува Македонија да се нарекува Западна Бугарија. Ковачевски и ова СДСМ се антидржавни елементи преку кои Македонија доживува понижувања. Во стилот на измеќар од Македонските Народни Приказни го видовме како се смее и одобрува едно од најголемите понижувања за Македонија. Еден Заев се замени со друг, во ликот на Ковачевски“, велат од ВМРО-ДПМНЕ.