Во далечната 2000 година, во рамки на реваншот од Лигата на шампиони меѓу Манчестер Јунајтед и Реал Мадрид, фудбалската публика беше сведок на еден од најубавите дриблинзи и потези во историјата на најелитното клупско натпреварување.

Во центарот на вниманието беше аргентинскиот маестро Фернандо Редондо. Фудбалерот на Реал ја прими топката по левата страна и на прв поглед делуваше дека ќе ја задржи играта покрај аут-линијата, но потоа следеше магија, со потег со пета помина покрај Берг и веднаш асистираше до Раул Гонзалес за погодок за 3-0.

„Кралскиот клуб“ подоцна, предводен д одличната игра на Редондо и Раул, обезбеди пласман во полуфиналето, а потоа преку Баерн и Валенсија стигна и до европската титула.

„Добро се сеќавам дека акцијата почна на нашата половина. Манчестер вршеше притисок, ја примив топката од Карлос и ја додадов до Савио, кој потоа ја префрли преку Гери Невил. Потоа тргнав по левото крило и се најдов во ситуација еден на еден. Тоа беше момент на инспирација. Никогаш претходно не сум го направил тоа во професионалната кариера, но како јуниор, да. Кога поминав, ја кренав главата и го видов Раул“, се присети Аргентинецот.

Ќе потсетиме, Реал Мадрид тогаш славеше со 3-2.