Жителите на преспанското село Љубојно веќе десетина дена протестираат и алармираат да престане сечењето дрвја на Планината Бистра над селото, алармирајќи дека поради сечата, по обилен дожд селото ќе биде поплавено, а тоа вчера и се случи. Во попладневните часови големо невреме го зафати Преспанскиот регион по што неколку куќи и дворови во Љубојно беа поплавени.

Мештаните раскажуваат дека 40 минути обилно врнел дожд, од кои 20 минути големи зрна град. Од невремето бил раскопан и земјениот пат што претходно бил оштетен од камионите кои пренесувале сечени дрва од шумата.

Од Владата, пак, претходно објаснија дека станува збор за регуларна сеча на нискостеблен даб во одделите 29 и 30 на шумско-стопанската единица „Пелистер – Брајчино“.

„Дабот има сечна зрелост согласно сите научни принципи. Оваа сеча е само една од стотиците во Македонија, спроведена по закон и со целосна контрола. Направен е премер од стручни лица, изготвен е план рецензиран од комисија, кој е одобрен од Министерството за земјоделство, шумарство и водостопанство“, велат од Владата.