По враќањето од обуките спроведени со западните партнери, пилотите на украинските воздухопловни сили брзо сфатиле дека правилата и шемите за воздушна борба што ги усвоиле не можат директно да се применат во условите на војната во Украина, објави „Бизнис Инсајдер“.

Реалноста над фронтот, велат тие, бара поинаков пристап и постојано прилагодување.

Причината е густата и агресивна руска воздушна одбрана, комбинирана со континуирано присуство на непријателски ловци во воздухот.

Според информации објавени од „Блогот за одбрана“, токму овие фактори ги натерале екипажите на Ф-16 самостојно да ги преиспитаат и редефинираат тактиките што им биле пренесени за време на обуката со партнерите од НАТО.

Во видео објавено од Украински воздухопловни сили, еден од пилотите објаснува дека западните методи се темелат на искуства од поинакви конфликти и не ги земаат целосно предвид специфичните закани со кои се соочуваат украинските авиони во близина на фронтовската линија.

„Кога се вративме дома од обука, се судривме со реалноста. Тактиките што ги учевме во странство не одговараат целосно на војната што ја водиме“, вели пилотот.

Според него, екипажите на Ф-16, меѓу кои има и искусни летачи со години стаж, биле принудени сами да развијат нови правила на ангажман – од пресретнување крстосувачки ракети, преку борба против беспилотни летала, до преживување во исклучително опасен воздушен простор.

Тој нагласува дека бојното поле е заситено со руски ракетни системи земја-воздух и со борбени авиони, што секоја мисија ја прави високоризична. Како главни воздушни закани ги посочува ловците Су-35, Су-57 и МиГ-31.

„Речиси секој лет кон фронтот значи дека кон нас се лансираат непријателски ракети, најчесто ракети воздух-воздух“, објаснува пилотот.

Поради тоа што руските авиони можат подолго да патролираат на поголеми височини и да ги чекаат украинските ударни групи, украинските пилоти се принудени да ја менуваат висинската тактика. Наместо летање високо, тие се спуштаат поблиску до земјата за да ја намалат изложеноста и на заканите од воздух и на оние од копнените ракетни системи.

„Немаме луксуз да останеме на големи височини. За жал, мора да летаме пониско за да ја намалиме заканата од системите земја-воздух“, додава тој.

Во такви услови, преживувањето зависи од маневрирање на ниска височина и од користење на конфигурацијата на теренот. Летањето блиску до земјата создава поголем „шум“ за радарите и ја отежнува работата на непријателските сензори и ракетни системи, кои потешко ја задржуваат целта.

Пилотот открива и дека дел од мисиите за придружба имаат јасна тактичка цел: Ф-16 намерно се изложуваат на руските ловци за да ги натераат да лансираат ракети и со тоа да ги исцрпат нивните залихи. На тој начин, ударните авиони со прецизно водени бомби добиваат простор да ја извршат задачата и безбедно да се вратат.

Во еден таков случај, како што опишува, три украински авиони успеале да ги испровоцираат руските борбени летала да испукаат ракети од различни правци, по што ударниот авион ја погодил целта и се вратил без загуби.