Нашинецот Миле Манев, кој десетина години со семејството живее и работи во Австралија, минатата недела се најде во ретка ситуација – тој присуствуваше на настан на славниот бенд „AC/DC“ на Плоштадот на Федерацијата во Мелбурн, како фотограф, и успеа да се пробие на самата сцена во моментот кога се случуваше најавениот спектакл – соборувањето на светскиот рекорд за настап на најголем ансамбл од гајди.

Вкупно 374 гајдаџии, најмногу досега во историјата кои настапуваат заедно, ја засвиреа песната „It’s a Long Way to the Top (If You Wanna Rock ‘n’ Roll)” на австралискиот бенд.

Манев, кој е родум од Радовиш и се занимава со фотографија, за „Слободен печат“ вели дека сосема случајно дошол на најдобрата можна позиција да го сними спектаклот и оти требало да фотографира, но едноставно морал да сними видео од неверојатната глетка.