ВИДЕО: МЗТ Скопје поразен од дебитантот во АБА 2 лигата
Првиот натпревар при „враќањето “ во АБА 2 лигата беше далеку од добар и позитивен за македонскиот шампион МЗТ Скопје Аеродром кој загуби уште на стартот на турнирот во Суботица откако загуби од дебитантот во ова натпреварување Цедевита Јуниор од Хрватска со 79:92.
Одлично, пред сè, шутираа противничките играчи во првите 10 минути. Погодија пет тројки од шест обиди, и воопшто не е чудно што на крајот дојдоа до бројката од 30 поени. МЗТ имаше шест помалку, за солидно водство на екипата од Загреб.
За разлика од веројатно најискусниот тим во оваа конкуренција, Цедевита Јуниор продолжи во ист, шутерски ритам и во втората четвртина, налик на првата, реализираше дури 29, или вкупно 59 до полувремето. Минути од играта во која младиот состав, предводен од Дамир Мулаомеровиќ „побегна“ и на позитива од 22 поени. Во 18 минута, Цедевита Јуниор имаше највисоки 57:35.
И само благодарение на присебноста на В. Стојановски, „металците“, кои во меѓувреме останаа без помошта на Баковиќ, не навлегоа во уште повисок минус. Имаа „само“ 43:59 по 20 минути. МЗТ делуваше неповрзано, без вистински идеи во нападот, премногу индивидуални акции, во кои, макар и на моменти, добија реализација токму од В. Стојановски и Ворку кои собраа 21 поен.
Се обидуваа „сино-белите“ во продолжението да симнат дел од високата негатива. Сè што успеаја, во третиот период, е да имаат минус од 13 поени. В. Стојановски продолжи со својата стандардно добра игра во нападот, доби помош, макар и делумна од Робев, потоа и Танасковиќ. По три четвртини, Цедевита Јуниор водеше против МЗТ Скопје Аеродром со 77:64.
Ништо не се промени ни во последниот дел од играта. Играчите на Васко Атанасов немаа сили да направат нешто повеќе од она што се обидуваа во претходните три, и мораа да се помират со првиот пораз во новото издание на АБА 2 лигата. Најефикасен во редовите на МЗТ беше В. Стојановски со 16 поени, два помалку запиша Расел. Кај Хрватите доминираше Кучиќ со 22 поени, а 18 имаше Рашиќ.
– За нас многу тежок натпревар, кој треба да го заборавиме што побрзо. Многу нè поремети повредата на Марко Баковиќ на почетокот, така што за нас генерално сè треба да подобриме за следниот меч за да очекуваме некоја победа – рече тренерот на МЗТ Атанасов по завршувањето на мечот.