Екипата на Ливерпул се врати на победничките патеки во Премиерлигата, совладувајќи го Фулам со 2-0 во рамките на 32. коло.

Дуелот понуди динамичен фудбал од самиот старт, но „црвените“ ја направија разликата во краток период од првото полувреме. Во интервал од четири минути, Рио Нгумоа и Мохамед Салах ги искористија шансите и донесоа сигурна предност од 2-0.

Во продолжението, Фулам прикажа подобра игра и создаде неколку солидни прилики, но голманот Џорџи Мамардашвили беше на висина на задачата и ја сочува својата мрежа.

Со новите три бода, Ливерпул се задржува на петтата позиција со 52 освоени бодови, додека Фулам останува на 11. место со 44 бода.