Рома и Севиља ќе играат финале во Лигата на Европа откако вечерва по продолженија Севиља го елиминираше Јувентус, а Рома одигра 0:0 со Баер Леверкузен.

Се бранеше Рома против Леверкузен 90 минути и успеа да издржи да не прими гол. Мурињо така ќе води тим во петтото европско финале во кариерата, додека Рома ќе игра своето второ во низа. Минатата година „волчицата“ ја освои Конференциската лига.

Севиља во второто полуфинале преку продолженија ја елиминираше „старата дама“ со 2:1. Јувентус и Севиља одиграа одличен натпревар во кој и двете екипи имаа свои шанси.

Душан Влаховиќ кој во игра влезе во 63-тата минута, само 120 секунди подоцна ја погоди мрежата на Севиља и го доведе Јувентус во водство. До изедначување шпанскиот претставник стигна со одличниот гол на Сусо во 72-та минута.

Конечните 2:1 ги постави Аргентинецот, Ерик Ламела кој со глава го матираше Шчесни во 95-тата минута.