Центарот за современи уметности (ЦАЦ) изработи кратко видео на кое се прикажани канализациите и отпадните води кои се влеваат во реката Вардар од нејзиниот извор во Вруток до излезот на Скопје.

Идејата е да се информираат граѓаните за, како што велат од ЦАЦ, „долгогодишното тивко уништување на најголемата река“ и да се обидат да ја подигнат свеста на надлежните, односно на Министерството за животна средина и општините за проблемот со загадувањето на Вардар но и на другите водотеци и езерски басени во Македонија.

„Не сакаме и не можеме да се помириме со фактот дека сите наши реки со проток поголем од 3 кубни метри во секунда се декларирани како загадени, значително или екстремно загадени како и со фактот дека нашите езера се борат за спас и преживување, а сето тоа се случува во период на глобално затоплување и претстоечки климатски промени. Со ова видео посветено на загадувањето на реката Вардар сакаме да потсетиме дека во ерата на глобалното затоплување кога водата станува еден од клучните стратешки и безбедносни ресурси на југот на Европа ние буквално го уништуваме најголемиот водотек во Македонија и ја правиме вардарската вода целосно неупотреблива бидејќи не прочистуваме ниту литро од отпадните води“, велат од ЦАЦ.

Со ова видео, од организацијата велат дека ги прашуваат градските власти на Гостивар, Тетово и Скопје како и министерството за животна средина до каде се пречистителните станици.

„Во наредниот период планирано е снимање на втор дел од видеото кој ќе ги опфати отпадните води од под Скопје до границата со Грција“, најавуваат од ЦАЦ.