Од денес почнуваме со голема акција заедно со Финансиска полиција кај еден голем даночен обврзник- објави Сања Лукаревска, во интервју за Слободна ТВ. За детали не сакаше да зборува и се повика на даночна тајна но се надева дека ќе има соработка од страна на даночниот обврзник.

– Точно е дека се подготвува акција со која почнуваме денес. Не би зборувала за кој даночен обврзник станува збор поради даночната тајна, но овде подолго време правевме анализи, ќе спроведеме попис. Малку е специфична дејноста на која ќе работиме денес, се надевам соодветно дека ќе имаме резултати. Се контролира само еден даночен обврзник- вели Лукаревска.

За Утрински печат Лукаревска рече дека најмногу неисплатени плати годинава за февруари и март има кај транспортерите, рестораните, козметичките салони и адвокатите.

– Ако ги погледнеме минатогодишните податоци ова се дејности кај кои се повторува состојбата со неисплатени плати. Проблемот мора системски да се решава, треба поригорозни мерки, опомени и блокади- вели Лукаревска

Во интервјуто зборувавме за нејзината функција Заменик на претседателот на СДСМ, за жените во политиката, за тоа дали е дојдено време конечно Северна Македонија да добие жена претседател.