Скопската „Арапска куќа“ ја изградил Ерменецот Агоп Дикиџијан како подарок за својата невеста Агавни. Вилата е изградена во 1936–1938 година и се издвојува со својот уникатен псевдомаварски стил, кој ја прави единствена во Скопје.

Внатрешноста е богато декорирана со разнобојни мермери, резби и скулптури, додека фасадата плени со шарени мотиви, необични прозорци и балкони, како вистинско уметничко платно.

Љубовната приказна завршува тажно – по смртта на Агоп, куќата се конфискува затоа што немале потомци, а Агавни заминува за Марсеј и никогаш не се враќа.

Низ годините, куќата менувала сопственици, меѓу кои Рустем Бег со сопругата Рустикана Натали и Димитар Влахов. Во 1964 година станува хотел „Јадран“.

Денес, „Арапска куќа“ е прогласена за споменик на културата и привлекува туристи и љубители на архитектурата. „Македонијатурист“ најави целосна реконструкција, што значи дека оваа необична градба наскоро повторно ќе оживее.