Одлуката за промена на Уставот е суверена одлука на секоја држава, а Северна Македонија веќе се обврза пред Бугарија дека ќе ги вклучи Бугарите и други заедници во Уставот, вели заменикот шеф на Делегацијата на ЕУ во земјава, Џулијан Васало.

На денешниот брифинг со новинарите Васало го објаснуваше скрининг процесот и отворањето на преговорите со ЕУ по кластери и потсети дека без промена на Уставот нема одење напред. Освен ова упати уште едно потсетување до опозицијата во земјава со која што , како што кажа, има редовни контакти.

– Имам постојани контакти со опозицијата која секогаш тврди е за евроинтеграција. Во еден момент ќе треба да преземе одговорност и да докаже дека е за евроинтеграција на земјата, како што тврди – изјави Васало.

Во контекст на почеток на преговорите со ЕУ по промена на Уставот, но во услови на постојани провокации од Бугарија, вклучувајќи ја и последната изјава на бугарскиот претседател Румен Радев, заменикот шеф на Делегацијата на ЕУ не одговори на залешката дека тоа се всушност провокации од ЕУ, бидејќи Бугарија е земја членка, туку само повтори дека проширувањата на Европската Унија се случуваат едногласно, со консензус.

– На секој чекор, во секога фаза, секогаш е можно една земја да направи проблеми. Но одлуките се носат едногласно и тоа не се менува – рече Васало.