Вардар и Е. Пелистер на 23 и 25 август ќе бркаат полуфинале во СЕХА лигата
Од претходно веќе беа познати паровите, а сега регионалната СЕХА лига ги одреди и термините и саатниците за четвртфиналните натпревари за сезоната 2021/22.
Потсетување дека за пласман на Фајнал-фор турнирот во Задар (Хрватска) ќе се борат осум екипи, помеѓу кои и Вардар 1961 и Е. Пелистер кои ја претставуваат Македонија.
Ќе се игра еден меч во четвртфиналнаа фаза, Вардар 1961 на 23 август во Скопје од 20.15 часот ќе игра против Нексе од Хрватска, а два дена подоцна во Битола составот на Е. Пелистер е домаќин на белорускиот Мешков Брест.
Претходно на 14 август од 19.45 часот во Унгарија Веспрем ќе го пречека словачкиот Татран Прешов, а на 17 август Војводина од Србија ќе игра против хрватскиот ППД Загреб.
Доколку скопските „црвено-црни“ триумфираат против Нексе, во полуфиналето на Ф4 турнирот ќе играат со подобриот од пресметката Војводина – ППД Загреб. А доколку битолчани слават против Мешков Брест, во полуфиналниот меч ќе се сретнат со Веспрем или Татран Прешов.