Раководството на Вардар донесе одлука да овозможи бесплатен влез за сите љубители на ракометот на дербито против Охрид, кое е закажано за 2 април (четврток) од 18:30 часот во СЦ „Јане Сандански“. Од клубот испратија порака до навивачите да ја исполнат салата и да му дадат силна поддршка на тимот во еден од клучните натпревари сезонава.

Станува збор за натпревар кој може да има големо влијание битката за титулата, па затоа атмосферата од трибините би можела да биде пресудна.

„Ова е моментот кога тимот има потреба од секој глас, од секоја поддршка и од полни трибини“, велат од Вардар.

Во моментов, Вардар сигурно го држи врвот во плејофот од Суперлигата со 46 бодови, што е четири повеќе од Пелистер, кој има и натпревар повеќе. Победа над „рибарите“ би значела сериозен чекор кон освојување на шампионскиот пехар.