„Вардар филм“ и Фондација „Лумбарди“ потпишаа меморандум за соработка
Националната установа Филмски центар „Вардар филм“ – Скопје и Фондацијата „Лумбарди“ од Призрен на 13 април потпишаа меморандум за соработка, со цел развивање на филмски програми, едукација во областа на историјата на филмот и програми за размена на искуства. Со меморандумот се очекува да се прошират и надградат капацитетите и регионалната соработка на овие две значајни институции на филмот и кинематографското наследство.
Документот беше потпишан во Призрен од директорот на „Вардар филм“, Сани Саиди, и од директорката за финансии и администрација на Фондацијата „Лумбарди“, Фиторе Реџепи.
Невладината организација „Лумбарди“ е основана во 2015, како продолжение на иницијативата за заштита на поранешната јавна установа – кино „Лумбарди“, чие седиште е во Призрен, Косово, и што оваа година одбележува 70 години од постоењето.
Јубилејот ќе се одбележи преку иницијативата за соработка со „Вардар филм“, во рамките на филмската програма „LXX“, на која ќе се прикажат и два филма во продукција на „Вардар филм“ – „Жед“ (1971) и „Македонски дел од пеколот“ (1971).
За оваа и за идните заеднички регионални проекти и програми, освен придонесот на раководството и вработените во овие институции, придонесоа и кураторите на програмата „LXX“ – Кумјана Новакова (филмска авторка и кураторка), Бенги Музабег (филмски теоретичар) и Ветон Нурколари (уметнички директор на „ДокуФест“, Призрен).
(Текстот е објавен во ТВ и Филмски печат на 29 април 2022 во весникот „Слободен печат“)