Советот на Општина Ѓорче Петров го усвои буџетот за 2026 година, кој, како што информираат од Општината,  претставува реален, одговорен и развоен финансиски план, насочен кон подобрување на квалитетот на живот на граѓаните и забрзување на локалниот развој.

Вкупниот буџет за 2026 година изнесува приближно 1,45 милијарди денари, при што речиси 60% се наменети за капитални расходи.

За капитални инвестиции се издвоени над 596 милиони денари, кои ќе бидат насочени кон: реконструкција и изградба на локални улици и инфраструктура, изградба и унапредување на детски градинки, значајни инвестиции во образованието, подобрување на јавната инфраструктура и осветлување, развој на спортот и рекреацијата.

Образованието останува еден од клучните приоритети, со значителни капитални и тековни вложувања во училишната инфраструктура, подобри услови за учениците и поддршка на наставниот кадар. Буџетот предвидува и зголемена поддршка за граѓаните преку субвенции, социјални мерки и трансфери, како и средства за поттикнување на локалниот економски развој, информираат од Ѓорче Петров.

Оттаму додаваат дека буџетот за 2026 година е балансиран и одржлив, изработен со строга финансиска дисциплина и јасна визија за развој на општината, при што секој денар е планиран со цел да донесе конкретен резултат и долгорочна корист за заедницата.