Удинезе очекуваше повеќе од Македонецот, три екипи во трката за Несторовски
Нашиот репрезентативец нема баш добра сезона во дресот на Удинезе, се шпекулира дека можно е да остане во Серија А.
Како што информира „tuttoudinese.it“, три италијански екипи се во трката за потписот на македонскиот репрезентативец.
Не беше баш досега добра оваа сезона за Илија Несторовски во дресот на Удинезе (договор до 30 јуни 2022), откако дојде минатото лето од Палермо.
Сезонава во Серија А нашиот напаѓач имаше само еден гол (против Сампдорија) во 17 одиграни натпревари. Изворот пишува дека се очекуваше многу повеќе да придонесе за клубот од Удине до прекинот на сезоната (поради коронавирусот) се наоѓаше на 14 место, само три бода повеќе од Лече кој е во опасната зона за испаѓање.
Во три години поминати во Палермо во најсилното италијанско првенство од 2016-2019 имаше вкупно 38 погодоци во 84 мечеви.
А пред да се пресели во Италија, за хрватскиот клуб Интер Запрешиќ во три години имаше 69 голови.
Неговите погодоци дефинитивно недостасуваат, последниот гол за македонската репрезентација во 2018 година против Гибралтар во рамките од УЕФА Лигата на нации.
Интерес за Несторовски покажува Беневенто кој е лидер во Серија Б и е пред промоција, односно враќање во елитата.
А во трката за Македонецот се наоѓаат уште СПАЛ и Бреша кои моментно се последнопласирани во Серија А.