Околу 154.000 федерални службеници прифатиле понуда за отпремнина од администрацијата на американскиот претседател Доналд Трамп оваа година, како дел од поширока стратегија за намалување на вработеноста во федералните институции, пренесе Ројтерс, повикувајќи се на извор запознаен со процесот.

Овој број не ги вклучува оние кои биле отпуштени или доброволно преминале на други програми, како што е Програмата за стимулации за рано пензионирање. Според истиот извор, сите вработени што ја прифатиле понудата ќе бидат отстранети од платниот список на федералната влада до крајот на годината, а ќе добијат неколкумесечна отпремнина.

Програмата, иницирана од поранешниот советник на Трамп, Илон Маск, кој во јануари беше поставен за раководител на Одделот за ефикасност на владата, резултирала со оставка на околу 6,7% од вкупната цивилна федерална работна сила.

Отпремнината им беше понудена на вработени во клучни институции, меѓу кои министерствата за земјоделство и енергетика, Даночната управа и други федерални агенции.

„Во нормални околности, флуктуација од 6,7% не би била изненадувачка. Но, оваа програма, заедно со отпуштањата, сериозно го намалува капацитетот на федералната влада“, изјави Дон Мојнихан, професор на Универзитетот во Мичиген.

Според податоци од непрофитната организација „Партнерство за јавна служба“, 116.000 вработени ја напуштиле владата во 2023 година, за време на претседателствувањето на Џозеф Бајден. Новиот бран на отпуштања под администрацијата на Трамп го надминува тој број за речиси 40.000 службеници.