Селекторот на македонската најдобра репрезентација, Александар Тодоров, ги одбра играчите кои ќе тренираат краток период во Скопје, а потоа ќе заминат во Естонија каде ќе земат учество во вториот „прозорец“ од најновиот евроквалификациски циклус.

Тодоров вели дека нема доволно простор како вообичаено да се тактизира однапред со оглед на тоа дека пандемијата со ковид-19 го диктира секој чекор на селекциите. Откажување нема, ниту пак е опција.

Во првите две кола од квалификациската група „Б“ за ЕП 2022 загубивме дома од Естонија (72:81), а во Перм беше претрпен пораз од Русија (77:67).

– Амбицијата кај нас секогаш постои, затоа што се игра за репрезентација и за еден циклус од шест натпревари во кои нема многу време за тактизирање. Она што нам ни се случува овие денови, сигурен сум дека го чувствуваат сите. Единствено нешто што е сигурно во моментов е несигурноста поради пандемијата. Првиот циклус во февруари имавме само еден здравствен проблем. Направивме еден список од 12 играчи со кои ќе тренираме во Скопје, а другите ќе ги чекаме во Талин. Ќе имаме конечна слика по последните тестови.

Негативни се тестовите, Тодоров на првиот тренинг со 12 играчи!

Ова е тешка ситуација за планирање. Во 2020 година во Европа секој игра кошарка, нема слаба селекција. Во која група и да бевме, со кого да се падневме, секој меч ќе беше тежок. Естонија ја има предноста кога е домаќин, но ние и така ќе моравме да одиме во Талин да победиме. И тие имаат свои проблеми, еднакво големи како нас. Во понеделник кога ќе допатуваме таму, кога ќе почнеме со тренинзи, ќе говориме поконкретно затоа што е втор меч. Италија има проблеми исто така, не знаеме со кои 12 ќе дојдат во Естонија. Кога ќе влеземе во тој „балон“ во Талин, секоја селекција ќе ги открие картите. Па и ние ќе ги дознаеме своите адути и ќе може да планираме нешто повеќе како тактика и скаутинг за противниците.

Доколку не постоеше шанса да победиме, немаше да патуваме за Талин, туку ќе останевме во Скопје и секој ќе си играше домашна лига. Сите се соочуваме со ковид-проблеми, ФИБА оцени дека мора да се игра, така што ќе одиме да се надигруваме – вели селекторот Тодоров на првиот официјален собир на репрезентацијата.