Театарската комедија „Не ми го чепкај пивото!“ е поставена според драмскиот текст „Не е тоа што мислиш“ на Армус Бериша Бели во режија на Ѓорѓи Ризески. Најголемиот дел од текстот е напишан од самиот театарски тим, тројцата актери и режисерот. Претставата се подготвува веќе неколку месеци со голем ентузијазам, љубов и упорност од страна на целиот тим, но и со одговорност, поддршка и помош едни на други, и со нула денари буџет.

– Претставата зборува за комичните ситуации во животот, како што се моментите на „извлекување“ кога си фатен на дело, моментите на инстант снаоѓање и глума. Може да се каже дека тоа е типичен македонски синдром на денешницата. Со многу пиво, смеење, еротика и непристојни игри сакаме да ја наведеме публиката низ позитивно и лесно гледиште да ја согледа палавата игра на човекот во „градот“ и низ целата претстава слатко да се насмее – велат од тимот што ја подготви претставата.

Во претставата играат актерите Надица Петрова, Давид Илиќ и Бобан Алексоски. Кореограф е Ирена Лозинска, сценографијата ја подготви Мартин Манев, а дизајнот на плакатот е на Александра Таушанов и Владимир Димковиќ. Асистент на режија е Тамара Стојаноска, на камера и монтажа на видео работеше Доан Доѓан, додека фотографијата е на Тамара Малкоска. Премиерата на претставата се изведува во рамките на програмата на „Скопско лето“. Со оваа претстава официјално ќе биде обележано отворањето на независниот театар „Златен Елец“.

(Текстот е објавен во „Културен печат“ број 41, во печатеното издание на „Слободен печат“ на 25-26 јули 2020)