Тајланд започна воздушни напади по должината на спорната граница со Камбоџа, соопшти тајландската војска, откако двете земји се обвинија меѓусебно за кршење на договорот за прекин на огнот постигнат со посредство на американскиот претседател Трамп.

Најмалку еден тајландски војник е убиен, а четворица се ранети во нови судири што избувнаа околу две области во најисточната покраина Убон Рачатани, соопшти тајландската војска, пренесуваат медиумите.

„Тајландската страна сега почна да користи авиони за напади врз воени цели во неколку области“, се вели во соопштението.

Министерството за одбрана на Камбоџа соопшти дека тајландската армија извршила напади во зори врз нејзините сили на две локации, по неколкудневните провокативни акции, додавајќи дека камбоџанските трупи не возвратиле.

Граничниот спор ескалираше во петдневна војна во јули, пред договорот за прекин на огнот постигнат со посредство на малезискиот премиер Анвар Ибрахим и американскиот претседател Доналд Трамп, кои исто така беа сведоци на потпишувањето на проширениот мировен договор меѓу двете земји во Куала Лумпур во октомври.

Најмалку 48 лица беа убиени, а околу 300.000 беа привремено раселени за време на конфликтот во јули, при што соседите разменуваа ракети и тежок артилериски оган.

Во Тајланд, повеќе од 385.000 цивили се евакуираат во четири погранични области, а повеќе од 35.000 веќе се сместени во привремени засолништа, соопшти тајландската војска.

Тајланд и Камбоџа повеќе од еден век го оспоруваат суверенитетот над необележаните точки долж копнената граница од 817 километри, првпат мапирани од Франција во 1907 година, кога таа владееше со Камбоџа како колонија.