– Да се зборува вистината денес, и да се застане на страната на најобесправените, навистина претставува реткост, но и огромна храброст. Во време на „инстант“ успеси и удобност во животот, да се зборува за и околу репресираните и обесправените, да им се пружи рака и поддршка, бескопромисно да се застане наспроти системот, го можат само оние кои не се плашат. Тоа е Ана Глигорова, режисерка и борец за правда, секогаш во првите ударни редови, носител на промени, мошне бавни, но постојани. Тоа е личноста која не се откажува и покрај борбата со ветерници и спротивставување со сите оние аспекти кои најјасно говорат за ова општество кое е во постојана транзиција, дваесет години наназад. Општество кое ги заштитува елитите, и во кое владеењето на правото и правдата се светлосни години оддалечени од секојдневието и луѓето кои го сочинуваат истото. Ана е истовремено чувар и просветител за вистинското значење на правдата, вели Лозаноска.