МЗТ Скопје е се подалеку од опстанок во АБА лигата откако денес доживеа нов пораз на домашен терен. Со победа од Аеродром си замина директниот ривал на „штрковите“ во битката за опстанок, тимот на Сплит.

Сплит славеше со 80:85 и го остави МЗТ на дното на табелата со само две победи. Натпреварот беше решен во последниот период кој Сплит го доби со 17:26.

Добро го стартуваше МЗТ мечот, на полувреме имаше и предност од еден поен разлика (41:40), а во последниот период влезе со четири поени предност. Сепак, играта на избраниците на Петровиќ во овој последен период не беше на потребното ниво, а Сплит знаеше како тоа да го искористи.

Најефикасен во тимот на МЗТ беше Војдан Стојановски со 17 поени, додека на спротивната страна поранешниот играч на МЗТ Скопје, Доминик Мавра постигна 23 поени.