Кога се соочувате со губење на косата, барате третмани кои навистина функционираат. Многумина се свртуваат кон докажани лекови како што е миноксидил. И покрај неодамнешните предупредувања за одредени здравствени ризици, многу од овие решенија се релативно достапни и се добиваат без рецепт.

Сега, според ново истражување, научниците истражуваат начин како миноксидилот да се направи уште поефикасен, а решението се крие во стевијата. Веројатно сте запознаени со стевијата како засладувач, но се чини дека би можела да има и друга цел, пишува „АОЛ“.

Конкретно, станува збор за стевиозид, соединение добиено од растението стевија, кое би можело да помогне во поттикнување на растот на косата. Важно е да се напомене дека истражувањето е сѐ уште во рана фаза и е спроведено на глувци, а не на луѓе. Сепак, резултатите се доволно импресивни што веќе предизвикаа големо внимание.

Истражувачите во студијата го комбинирале стевиозидот со фластери со микроиглички, кои користат ситни иглички за подобра испорака на активната состојка, во овој случај, миноксидил, во кожата. Тестирањето е спроведено на глувци кои биле генетски модифицирани да ја губат косата. Резултатите покажале дека значително поголема количина миноксидил навлегла во кожата и го поттикнала растот на влакната кај глувците кои користеле фластери со стевиозид во споредба со оние кои примале само миноксидил. По 35 дена, кај глувците третирани со фластери со стевиозид, влакната повторно пораснале на 67,5 проценти од третираната површина, што бил значително подобар резултат од другите тестирани методи.

Како стевијата помага во растот на косата?

Точниот механизам сѐ уште се истражува, но научниците имаат теорија: стевиозидот помага миноксидилот подобро да се раствори во вода. Теоретски, тоа овозможува поголема количина од активната состојка да навлезе под кожата до фоликулите на влакната и да поттикне посилен раст.

Во суштина, стевиозидот „дејствува како природен засилувач на апсорпцијата“, објаснува д-р Гери Голденберг, доцент по дерматологија во болницата Маунт Синај.

„Миноксидилот има ограничена пропустливост низ кожата, што ја намалува неговата ефикасност во традиционалната примена“, продолжува тој.

Меѓутоа, примената на миноксидил преку растворливи микроиглички збогатени со соединение како што е стевиозидот може да го заобиколи отпорот на кожата и да овозможи подлабока пенетрација, а со тоа и подобар ефект.

 „Во мојата пракса ја користам техниката на микроиглички во комбинација со миноксидил за да ја подобрам ефикасноста. Но, потребни ни се контролирани клинички испитувања за да се потврди ефективноста на додавањето на стевиозид, но и неговата безбедност. Сѐ уште не знаеме кои би можеле да бидат потенцијалните несакани ефекти“, вели д-р Ифе Џ. Родни, основач на клиниката „Вечна дерматологија и естетика.

Не нанесувајте стевија директно на скалпот

Ако дома имате стевија и миноксидил, примамливо е да се обидете да направите своја мешавина. Сепак, д-р Голденберг предупредува дека тоа веројатно нема да помогне.

„Без техниката на микроиглички, нанесувањето стевија на скалпот нема да има значаен ефект. Миноксидилот сѐ уште би го имал истиот проблем со апсорпцијата како и кога се користи самостојно“, вели тој.

Најдобро е да се консултирате со дерматолог ако се борите со губење на косата, нагласува д-р Родни.

„Миноксидилот е многу корисен за некои форми на губење на косата и можете да го користите дома додека чекате термин кај дерматолог. Меѓутоа, постојат многу различни причини и третмани за губење на косата. Во зависност од причината, миноксидилот можеби не е единственото или најдоброто решение“, вели Родни.

Методи во борбата против опаѓање на косата

Дерматолозите доследно препорачуваат неколку проверени стратегии кои можат да помогнат, често во комбинација.

Локални препарати со миноксидил

Овие производи доаѓаат во форма на раствори или пени, обично во концентрации од два проценти или пет проценти. Се сметаат за прва линија на одбрана кај одредени типови на опаѓање на косата.

Ласерска терапија со ниско ниво на светлина 

Истражувањата покажуваат дека ласерската светлина може да помогне во запирање на опаѓањето и поттикнување на растот на косата. Третманот се спроведува со помош на уреди како што се ласерски чешли или капи.

Додатоци во исхраната

Мешавини на витамини, минерали како цинк и селен и морски колаген можат да ги таргетираат главните причини за губење на косата, вклучувајќи стрес и лоша исхрана.

Медицински шампони

Шампоните против првут можат да помогнат во смирување на воспалението и контрола на габичките на скалпот, што исто така може да придонесе за намалување на губењето на косата. Вашиот дерматолог исто така може да истражи голем број други можности за третман, од локални и орални лекови, терапија со црвено светло, плазма богата со тромбоцити (PRP), па сѐ до трансплантација на коса.

„Комбинацијата на овие третмани се покажа како најефикасна за моите пациенти“, заклучува д-р Голденберг.