По страотниот пожар во четвртокот кога мостот „Беласица“ кој води од Железничката станица до трговскиот центар „Ист гејт“ беше затворен и прогласен за небезбеден за сообраќај на возила и пешаци додека не се поправи, приодот кон него е блокиран со бетонски столбови „позајмени“ од поставката на скопска улична уметност од 2019 година.

Во тој период над 30-тина дела беа распоредени долж главните сообраќајници во Скопје, како „Партизанска“ и „Илинденска“, а дел и пред културните институции во градот.

Екс градоначалникот на Скопје на Фејсбук искоментира:

-Некои работи едноставно нема начин како соодветно да бидат искоментирани, освен како „фестивал на глупоста”, напиша Шилегов, покажувајќи ги фотографиите од уметничките дела кои го разубавуваа градот додека не се најдоа од вертикала во хоризонтала кај Железничка станица.

„Легнатите“ мурали се дела на познати македонски улични уметници и цртачи на графити со кои се разубавуваше градот, а градските власти сега им најдоа нова намена, доведувајќи ги во опасност да бидат оштетени и уништени.

На социјалните мрежи потегот се коментира како крајно непочитување на македонските уметници и нивните уметнички дела.