Со манифестацијата „Тетовирани импресии“ ФДУ го одбележува творештвото на Горан Стефановски
Факултетот за драмски уметности (ФДУ) – Скопје го слави творештвото на својот некогашен професор и драмски автор Горан Стефановски со мултимедијална програма под наслов „Тетовирани импресии“.
Настаните од програмата ќе се одржат од 27 март до 27 април во организација на ФДУ и со учество на соработници, колеги и новите „наследници“ на Горан – студентите кои ги продолжуваат неговите приказни. Тие ќе потсетат на творештвото кое претставува бескрајна инспирација за минатите, сегашните и идните генерации на факултетот.
– Горан Стефановски е инспирација која нé поттикнува кон подобро и повеќе уште од нашата „Бушава азбука“. И од „Јане Задрогаз“, преку „Диво месо“, „Лет во место“, „Хај-фај“, „Дупло дно“, „Тетовирани души“, „Чернодрински се враќа дома“…, сѐ до „Огнени јазици“. Од нивното запознавање, разбирање, препрочитување и поставување, до одново станување и борење за она што е вистински наше – истакнуваат од ФДУ.
Манифестацијата „Тетовирани импресии“ ќе почне со одбележување на Светскиот ден на театарот, на 27 март. Во рамки на програмата ќе може да се гледаат испитни претстави и етиди по текстови на Горан, проекции на филмови по негови сценарија и презентација на документарен филм во реализација, посветен на неговото дело.
Во рамките на програмата ќе може да се слушне и како изгледала соработката со Горан преку дискусии со неговите долгогодишни соработници, а и музичка програма во соработка со студенти од Факултетот за музичка уметност. Програмата ќе се заокружи на 27 април, роденденот на Горан Стефановски.
Влезот за сите настани е слободен. Деталите за секој настан ќе бидат дополнително објавени на веб-страницата и на социјалните мрежи на Факултетот за драмски уметности во Скопје.