Пратеникот на Алтернатива Скендер Реџепи преку Фејсбук информира дека утре ќе го извести претседателот на Собранието Талат Џафери дека повеќе не е координатор на пратеничката група на Алтернатива и на Алијанса за Албанците. Реџепи, според информации на „Слободен печат“ можно е да биде нов потпретседател на Собранието откако Алтернатива стана дел од владејачкото мнозинство. Изборот за потпретседател на Собранието од Алтернатива ќе биде меѓу Реџепи и пратеникот Хусни Исманили.

Според информации од Алтернатива потпретседателската функција во Собранието е дел од пакетот за поделба на ресорите помеѓу премиерот Зоран заев и лидерот на Алтернатива Африм Гаши за влез на партијата во власта.

-Врз основа на новите политички случувања и одлуката на Централното собрание на Алтернатива дека ние како политички субјект се приклучивме на извршната власт и на парламентарното мнозинство, утре официјално ќе го известам претседателот на Собранието на Северна Македонија за оставка од координатор на пратеничката група на Алтеранатива и Алијанса за Албанците – се вели во објавата на Реџепи.

Собранието сега има двајца потпретседатели и тоа Горан Мисовски од власта и Фадил Зендели сега од опозициската Беса.