Македонскиот пијанист со светска слава Симон Трпчески ќе прослави 25-годишен јубилеј со концерт на 20 декември во Арената „Борис Трајковски“, кој го организира „Прагма продукција“ во соработка со Националната опера и балет.

Трпчески на прес-конференцијата во Скопје рече дека концертот ќе биде новогодишна латино-музичка идила. Акцент ќе биде ставен на латино теми во новогодишен дух и аранжирани за голем оркестар со кој ќе диригира маестро Сашо Татарчевски.

– Овојпат нема да откривам многу за гостите, ќе остане да биде новогодишно изненадување за публиката – рече Трпчески, кој на ланскиот концерт во истата сала запеа во дует со својата ќерка Лара.

– На моите деца дома им дадов задача која беше воедно и час по географија. Тие ги запишуваа земјите во кои сум настапувал за овие 25 години и избројавме 52 земји. По Нова година ќе одморам дома и сакам да направам една вечера за моите пријатели – рече пијанистот низ насмевка.

За него, успехот на светско ниво се должи на посветеноста и на сериозноста. Трпчески рече дека е сѐ во добрата организација. Тој најави дека на концертот ќе настапи ансамблот „Македонисимо“, Оркестарот на НОБ, концерт-мајсторот на Оркестарот, Климент Тодороски и уште неколку гости. Во првиот дел од концертот ќе се изведат дела од композитори од Латинска Америка, како и дела инспирирани од Латинска Америка, а во вториот дел македонски дела, во аранжман на Панде Шахов, кој ќе дојде од Лондон за концертот.

Менаџерот Кристијан Стефановски од продукција „Прагма“ рече дека му е голема чест што по вторпат организираат концерт на местро Трпчески и им се заблагодари на медиумите за поддршката за македонската музика која е сега најпотребна.

Диригентот Сашо Татарчевски рече дека секојпат кога ја дели сцената со Симон Трпчески е ново доживување.

– Имам трема кога свирам дома. Но, дома е дома, свириш пред свои луѓе, поубаво е, има топлина – додаде Трпчески, кој новата концерна сезона во јануари во 2026 ќе ја почне со концерт во Торино, а го чека полна агенда во Европа, Америка и Азија.